Rothenthurm - Einsiedeln, 21.09.2019

26 Bergclübler*inne hend sich für die Moorwanderig agmeldet. Mer sind in Rothethurm Altmatt gstartet und noch eme kurze Ufstieg hemer üs uf de Terrasse vom «Steinstoss-Stübli» mit Kafi und Gipfeli gstärkt. Aschlüssend sind mir uf ebnem Weg dur e grosses Moor mit brunrotem Ried-Gras gwanderet, mengmol unterbroche mit chline grüene Wiesli. Am Rand vom Wäg hend scho e hufe Herstzytlose blüeht. I dem Moor söll no fast bis Ende vom 20. Johrhundert Torf gstoche worde si.
Zmol hend mer gmerkt, dass ei Person fehlt. Scho bald isch de «Fotograf» wieder zo üs gstosse und mir hend wieder vollzählig e längere Ufstieg unter d’Füess gno und denn bimene Hüttli üsers Pic Nic gesse. Es het nume ei Bank gha und so hend die meiste uf ere mitbrochte Sitzunterlag ufem Moorbode müese sitze.
D’Paula het üs uf die letzte «Ankebälleli» ufmerksam gmacht, die zwösche de «Hahnefüess» blüeht hend. Denn semer wyter gwanderet zur Ruchegg, zum höchste Punkt, und sind denn de Wäg nach Trachslau abe gange, wo de Wanderleiter üs allne e Getränk spendiert het, will er hüt sini 100. Bergclub-Wanderig gleitet het. Vile Dank för die Grosszügigkeit!
Aschlüssend sind mir meist uf Naturstross noch Einsiedle glaufe, wo mir e ganzi Stund Zyt gha hend, die wunderschöne Chlosterkirche z’bestune und s’Ort Einsiedle z’erkunde.
Nochher het üs d’Bahn noch Bern gfahre. S’Wetter isch strahlend schön gsi. Danke Jürg, för die abwechsligsriche Tour und dass Du vorgängig e super Spotsommerwetter für üs «bstellt» hesch.

Theres